එම්.එච්.370 අතුරුදහන් වී වසරක් සපිරෙයි

මැලේසියානු ගුවන් සේවයට අයත් එම්.එච්.370 දරණ ගුවන් යානය අතුරුදන් වී අදට වසරක් සම්පූර්ණ වී තිබේ.

යානයේ ගමන් කළ පුද්ගලයින් සිහිකරමින් ඔවුන්ගේ ඥාතීන් විසින් මලයාසියාවේ ක්වාලාලම්පූර් අගනුවර සැමරුම් උත්සව රැසක් සංවිධානය කර ඇති බව  විදෙස් මාධ්‍ය වාර්තා කළේය.

මගීන් සහ කාර්යය මණ්ඩලය 239 දෙනෙකු රැගත් ගුවන් යානය මලයාසියාවේ ක්වාලාලම්පූර් අගනුවර සිට චීනයේ බිජිං බලා ගමන් කරමින් සිටියදි පසුගිය වසරේ මාර්තු මස 8 වන දින අතුරුදන් වුණි.

යානය සම්බන්ධයෙන් මේ වන තෙක් කිසිදු තොරතුරක් අනාවරණය වී නොමැති අතර කෙසේවෙතත් ඒ සම්බන්ධයෙන් සිදුකරන මෙහෙයුම් අඛණ්ඩව සිදුකරන බව  මලයාසියානු රජය පැවසුවේය.

යානය සෙවීම සඳහා මේ වන විට සිදුකර ඇති මෙහෙයුම් සම්බන්ධයෙන් වාර්තාවක් අද දිනයේ නිකුත් කරන බව ද  මලයාසියානු රජය ප්‍රකාශ කර තිබේ.