Posts
බ්‍රිතාන්‍ය හිටපු මහ කොමසාරිස් ක්‍රිස් නෝනිස් මහතා ජනාධිපති මෛත්‍රීපාල සිරිසේන මහතාගේ ජාත්‍යන්තර කටයුතු පිළිබඳ උපදේශකවරයා වශයෙන් පත් කර තිබේ.
ඒ මහතා අද (06දා) පස්වරුවේ ජනාධිපති කාර්යාලයේදී ජනාධිපතිතුමා අතින් සිය පත්වීම් ලිපිය ලබා ගත්බව ජනපති මාධ්‍ය අංශය සඳහ් කරයි.
ක්‍රිස් නෝනිස් මහතා ලන්ඩන් විශ්ව විද්‍යාලයේ වෛද්‍ය විද්‍යා උපාධිධරයෙකි. ඒ මහතා සිය පශ්චාත් උපාධිය කේම්බ්‍රිජ් විශ්ව විද්‍යාලයෙන් ලබා ගත් අතර වෛද්‍යවරයෙකු ලෙස වසර ගණනාවක් බ්‍රිතාන්‍යයේ ජාතික සෞඛ්‍ය සේවයේ කටයුතු කොට තිබේ.
හෘද රෝග විශේෂඥ වෛද්‍යවරයෙකු ලෙස වෛද්‍ය වෘත්තියේ ඉහළ ගෞරවයක් දිනාගත් නෝනිස් මහතා ජාත්‍යන්තර සංවිධාන ගණනාවක ඉහළ නිලතල දරා තිබේ. ඔහු රාජකීය පොදු රාජ්‍ය මණ්ඩලීය සංගමයට ද එක් වූ කීර්තිමත් ශ්‍රී ලාංකිකයෙකි. පසුව එහි නියෝජ්‍ය සභාපති තනතුර හෙබවීමට ද ඔහු සමත් වෙයි.
බ්‍රිතාන්‍යයේ මහකොමසාරිස්වරයා ලෙස කටයුතු කළ වකවානුවේ බ්‍රිතාන්‍යය රාජ්‍යයත්, සිවිල් සමාජය සේම ව්‍යාපාරික ප්‍රජාව ද සමඟ සමීප සබඳතා පවත්වමින් ශ්‍රී ලංකාව සහ බ්‍රිතාන්‍ය අතර සබඳතා තර කිරීමට ඒ මහතාට හැකි වූ බව ජනපති මාධ්‍ය අංශය සඳහන් කරයි. එසේම ශ්‍රී ලංකාවට එරෙහිව දෙමළ ඩයස් පෝරාව ගෙන ගිය දුර්මතයන් පරාජය කිරීමට සමත්වීම තුළින් ද ක්‍රිස් නෝනිස් මහතා සිය කීර්තිමත් රාජ්‍ය තාන්ත්‍රික බව තහවුරු කළ බව ජනපති මාධ්‍ය අංශය නිකුත් කළ නිවේදනයේ දැක්වෙයි.
No comments:
Post a Comment